Sulmuesi i Liverpool-it, Hugo Ekitike, ka pësuar një dëmtim serioz gjatë ndeshjes së Ligës së Kampionëve ndaj Paris Saint-Germain, një situatë që ka ngritur shqetësime të mëdha si për klubin anglez ashtu edhe për kombëtaren e Francës.
Incidenti ndodhi pa kontakt me ndonjë lojtar kundërshtar, kur Ekitike ndjeu një dhimbje të fortë në zonën e tendinit të Akilit. Ai u rrëzua në fushë dhe nuk mundi të vazhdonte lojën, duke u detyruar të largohej me barelë.
Sipas raportimeve të para, dyshohet se bëhet fjalë për një dëmtim shumë serioz, madje ekziston frika për një këputje të mundshme të tendinit të Akilit. Ky lloj dëmtimi zakonisht kërkon një periudhë të gjatë rikuperimi.
Nëse konfirmohet diagnoza më e rëndë, Ekitike mund të humbasë pjesën e mbetur të sezonit dhe të vihet në dyshim edhe pjesëmarrja e tij në Kampionatin Botëror me Francën.
Stafi mjekësor i Liverpool-it pritet të kryejë ekzaminime të detajuara për të përcaktuar shkallën e dëmtimit dhe kohën e rikuperimit. Klubi ende nuk ka dhënë një deklaratë zyrtare mbi gjendjen e sulmuesit.
Sinjali – aty ku e vërteta flet para lajmit!
