Shtetet që u ndaluan të marrin pjesë në funeralin e Mbretëreshës

Ftesat për funeralin e Mbretëreshës Elizabeth nuk janë dërguar në Rusi, Bjellorusi dhe Mianmar.

Irani do të përfaqësohet vetëm në një nivel ambasadori.

Britania nuk ka ftuar përfaqësues nga të tre vendet në funeralin shtetëror të së hënës.

Mbretëria e Bashkuar, së bashku me aleatët e saj perëndimorë, ka kërkuar të izolojë Rusinë dhe aleatin e saj Bjellorusinë në skenën botërore me sanksione ekonomike dhe masa të tjera në përgjigje të pushtimit të Ukrainës nga Moska.

Mianmari dhe ushtria e tij kanë qenë gjithashtu subjekt i sanksioneve britanike dhe nuk janë ftuar të marrin pjesë në ceremoni.

Rreth 500 personalitete të huaja pritet të marrin pjesë në funeralin në Londër, me ftesa të dërguara tani për krerët e shteteve të shumicës së vendeve me të cilat Britania ka marrëdhënie diplomatike, tha BBC .

Një mori liderësh botërorë nga Presidenti i SHBA Joe Biden dhe Zonja e Parë Jill Biden, tek kryeministrat e Kanadasë, Australisë dhe Zelandës së Re kanë konfirmuar të gjithë pjesëmarrjen në këtë ngjarje, e cila ka të ngjarë të jetë një nga tubimet më të mëdha diplomatike të Britanisë në vite.

Zëdhënësi i Kremlinit Dmitry Peskov njoftoi të premten se presidenti rus Vladimir Putin nuk do të marrë pjesë në funeral.

Peskov tha se megjithëse rusët “respektojnë” Mbretëreshën “për mençurinë e saj”, pjesëmarrja e Putinit në funeral nuk është një opsion por shtoi se do të merret një vendim se kush do të përfaqësojë kombin në ceremoni.