Shtatë gola në ‘Anfield’, kampioni e nis me fitore të vështirë

Qysh në fillim të edicionit, Premierliga ka nisur të dhurojë emocione të jashtëzakonshme.

Ndeshja mes kampionit në fuqi Liverpool dhe ekipit të sapoinkuadruar Leeds United përfundoi me rezultat 4:3, në një ndeshje të jashtëzakonshme në ‘Anfield’, ku Mohamed Salah realizoi tre gola, dy nga penalltia.

45 minutat e para u shënuan pesë gola, tre nga Liverpool dhe dy nga mysafirët.

Ishte Salah (4’) që e hapi serinë e golave nga penalltia, para se Jack Harrison (12’) me një gol mjaft të bukur baraspeshoi rezultatin.

Por vendasit u kundërpërgjigjen shumë shpejt me anë të Virgil van Dijk (20’). Ky i fundit bëri një gabim katastrofal që i kushtoi me golin e dytë të pësuar nga Patrick Bamford (30’).

Vetëm pas tre minutave, ylli egjiptian (33’) realizoi për 3:2.

Skuadra e Marcelo Bielsa nuk u dorëzua për asnjë moment, dhe kësisoj barazoi për herë të tretë rezultat me anë Klich (66’).

Ndeshja vijoi e baraspeshuar, por episodi pak para fundit vendosi fituesin. Fabinho fitoi një penallti, të cilën e konvertoi në gol për të dytën herë sonte Mohamed Salah (88’), duke kompletuar het-trikun dhe duke i dhënë tre pikë skuadrës së tij në javën e parë.

Liverpool udhëton te Chelsea në takimin e ardhshëm, kurse Leeds pret Fulhamin.