Ditë më parë në mediat zvicerane është raportuar për vrasjen e një gruaje të re nga vjehrri i saj, të dy me prejardhje nga Kosova.

Sipas mediave të huaja, bëhet fjalë për një grua, 24-vjeçe, e cila siç pretendohet ishte viktimë e një sulmi nga vjehrri i saj 56 vjeçar – ngjarje kjo e ndodhur në Pratteln të Kantonit Basel-Landschaft.

Siç ishte raportuar, mbetet e paqartë fakti se pse kosovari 56 vjeçar e kishte vrarë të renë dhe nënën e nipit të tij 4 vjeçar.

Dhe lidhur me këtë mediat kishin kontaktuar një përfaqësues të familjes së dorasit, i cili kishte thënë se “ai mund të ketë vepruar në vetëmbrojtje” duke supozuar se “ndoshta nusja e ka sulmuar, pasi që edhe ai ishte plagosur, në dorë”.

Po sipas mediave zvicerane, sfondi i mosmarrëveshjes mund të ketë qenë divorci i planifikuar në mes të çiftit të ri.

Djali i 56 vjeçarit kishte marrë fshehurazi një avokat për të bërë divorcin, thonë anëtarë të familjes.

Në momentin kur nusja ka marrë vesh për planin e të shoqit, ajo thuhet se ka shkuar te vjehrra me djalin e saj dhe mund ta ketë fajësuar për problemet e saj martesore – prej nga ka mundur të vije deri tek përshkallëzimi i mosmarrëveshjeve.

Ndërkohë në një shkrim të radhës, mediumi zviceran Blick.ch shkruan se martesa e pafat e Adelinës (24) dhe Enes T. * (27) përfundoi të shtunën me vdekjen e gruas së re.

Dhe sipas Michael Lutz, zëdhënës i zyrës së prokurorit publik të Baselland, autori i dyshuar tani është vendosur në paraburgim. Lutz konfirmon se ky është vjehrri i viktimës.

Në këtë drejtim, përveç rrëfimit të familjarëve të dorasit, mediat zvicerane kanë marrë opinionet e dy shoqeve të viktimës.

Sipas njërës prej tyre, Albana *, një mike e Adelinën, e cila nga frika e familjes së autorit të krimit, dëshiron të mbetet anonim.

Ajo mund të thotë vetëm gjëra të mira për Adelina T.

“Ajo ishte e mirë dhe e denjë për të gjithë, punoi shumë”, thotë Albana. “Por burri i saj ishte shumë, shumë xheloz”.

Siç ka shtuar ajo, Enes T. nuk do ta pranonte që gruaja e tij të punonte me burra.

“Unë mendoj se ajo duhej të ndryshonte punë për shkak të kësaj”.

“Ajo nuk ishte mirë në këtë martesë, por prapë ajo e donte shumë burrin e saj dhe kujdesej për djalin me dashuri”, citohet të ketë thënë ndër tjerash ajo.

Edhe shoqja tjetër e Adelinës, Emira *, tërheq gjithashtu një pamje të ndryshme rreth viktimës, përcjell Telegrafi.

“Adelina ishte një nënë dhe amvise e mirë. Ajo kujdesej për gjithçka në shtëpi, gjithmonë përpiqej të ishte një grua e mirë. Por ajo më tha që vjehrrit e saj nuk ishin kurrë të lumtur me të – pavarësisht se çfarë bëri”.

“Unë mendoj se edhe ajo u rrah”, thotë Emira. “Pashë buzët e saj të çara, gërvishtjet dhe të mavijosura”.

Emira dhe Albana janë të zemëruara keq nga familjarët e autorit që raportojnë për fatalitetin.

Albana thotë: “Ajo sigurisht nuk është fajtori. Ajo ka vdekur dhe nuk mund të thotë asgjë më shumë për këtë”.

Ajo e konsideron çdo deklaratë nga familja e autorit si pretendim për mbrojtje.

Dhe për fund, Emira thotë: “Një grua e re humbi jetën dhe një djalë i vogël tani nuk ka nënë”.