Arb Manaj debuton me gol në fitoren e Ballkanit, dy takimet tjera pa fitues

Ballkani ka fituar 2-1 ndaj Gjilanit në kuadër të javës së katërt në Albi Mall Superligën e Kosovës.

Ishte minuta e 19-të e takimit kur Ballkani kaloi në epërsi me golin e Albin Berishës.

Dy skuadrat patën raste të mira shënimi në minutat në vazhdim, mirëpo u mungoi konkretizimi.

Pjesa e parë përfundoi me këtë gol të vetëm, ndërsa e dyta pati një ritëm më të shpejt.

Ishte minuta e 59-të e përballjes, kur Gjilani i barazoi shifrat në 1-1 me golin e Oltion Bilallit.

Në minutat e mbetur, Ballkani e kërkoi me ngulm fitore dhe atë e arriti në minutën e 78-të me anë të Arb Manaj, që debutoi me gol – derisa Walid Hamidi ishte asistuesi.

Ballkani ka arkëtuar nëntë pikë dhe gjendet në vendin e tretë, ndërsa Gjilani është në të tetin me një sosh.

Në xhiron e pestë, skuadra nga Suhareka do të ketë punë me Dukagjinin, ndërsa gjilanasit përballen me Malishevën.

Llapi dhe Prishtina kanë ndarë pikët në barazimin 0-0 në “Zahir Pajaziti” në kuadër të xhiros së katërt të Superligës së Kosovës.

Baraz por me shifrat 2:2, përfundoi edhe takimi në mes Dritës dhe Dukagjinit.