Blerim Kuqi rikthehet në LDK, zyrtarizon mbështetjen për Ardian Shalën në garën për kryetar të Suharekës

Në një ngjarje të zhvilluar sot në Suharekë, është zyrtarizuar mbështetja e ish-kryetarit të komunës, Blerim Kuçi, për kandidatin e LDK-së, Ardian Shala.

Ceremonia u mbajt në prani të kryetarit të LDK-së, Lumir Abdixhiku.

Kuqi, një nga figurat më me përvojë në politikën lokale dhe qendrore, nga sot zyrtarisht bashkë me kryetarin e nëndegës së AAK-së në fshatin Reshtan Shezair Elshani janë parë në krah të Ardian Shalës në përpjekjen për të rikthyer qeverisjen lokale nën drejtimin e LDK-së, njofton media lokale Suhareka Express.

Gjatë fjalimit të tij, Kuqi theksoi se përkrahja e tij vjen pas një analize të thellë për të ardhmen e komunës dhe nevojës për një vizion të qartë, stabilitet dhe zhvillim.

Ai shtoi se Ardian Shala përfaqëson një qasje serioze dhe të përgjegjshme në raport me qytetarët dhe se bashkë me ekipin e tij janë të përgatitur për të sjellë ndryshimin që Suhareka ka nevojë.

Ndryshe, ish-deputeti i AAK-së dhe ish-kryetari i Suharekës, Blerim Kuçi, kohë më parë kishte lënë të kuptohet se mund të jetë afër kalimit në Lidhjen Demokratike të Kosovës (LDK).

Në Debat Plus, Kuçi kishte deklaruar se ka një orientim të ri për të ardhmen e tij politike, por shtoi se ende nuk është momenti për të zbuluar më shumë detaje.

“E kam një orientim, por nuk është momenti për ta thënë. E para është se kam një botëkuptim tjetër për Suharekën, si qytet kam qejf me qenë më i veçantë dhe po e shoh një mundësi tjetër”, kishte deklaruar Kuçi.

Në fakt, për ish-Ministrin Kuçi aderimi në LDK do të thotë rikthim pas 17 vitesh tek kjo parti politike.