Prokuroria Themelore e Prishtinës ka paraqitur kërkesën për caktimin e paraburgimit ndaj A.M., dhe L.B., të dy nga 26 vjeç, të dyshuar për vrasjen e 41-vjeçarit Arsim Hamiti të dielën në Fushë Kosovë.
Këtë informacion e ka konfirmuar për Gazetën Express zëdhënësja e Prokurorisë Themelore të Prishtinës, Laureta Ulaj.
“Ju njoftojmë se Prokurori i Shtetit ka paraqitur kërkesë për caktimin e masës së paraburgimit ndaj dy të pandehurve, për shkak të veprës penale “Vrasja”, pranë Gjykatës kompetente”, tha Ulaj për Express.
![](https://albaniannews.net/wp-content/uploads/2024/05/holiday-300x250-1.png")
Viktima është privuar nga jeta me thikë në rrugën “Pjetër Budi” në Fushë Kosovë.
Thika që dyshohet se është përdorë në këtë rast është sekuestruar.
Të hënën Shefqet Hasimi, avokati i L.B., i dyshuar për vrasjen e 41-vjeçarit Arsim Hamiti ka treguar versionin e 26-vjeçarit se çfarë tha ai në stacionin policor për vrasjen. Sipas të dyshuarit L.B., ai dhe shoku i tij A.M., nuk janë njohur më parë me viktimën.
Sipas avokatit, i dyshuari ka deklaruar në stacionin policor se viktima kishte tentuar ta hapte në parking veturën e tij të marrë me qera dhe sipas tij, kur e ka parë këtë ngjarje e ka thirrë shokun e tij dhe e kanë takuar viktimën ku pas përleshjes fizike ngjarja ka përfunduar me vrasjen e 41-vjeçarit.
“Sipas deklarimit të tij ky e ka marrë një veturë me qera edhe e ka lënë në parking ka thënë e kam pa një person duke tentuar me hap derën edhe ka ikë nga vendi i ngjarjes, ky e ka thirrë shokun e tij, hajde se kam problem me njërin, ai prej Orlloviqit ka ardhë shpejt e shpejt janë bë bashkë, qysh ka deklaru e kanë pritë rreth 20 minuta derisa u dalë në një rrugë, ju kanë lëshu me një veturë, janë fjalos janë grushtu, edhe ai (shoku i tij) e ka nxjerr thikën e ka mbyt në vend. Ai qysh tha sjemi njoftë më herët, rastësisht ka ndodhë. Ashtu është deklaru”, ka deklaruar avokati Hasimi.
![](https://albaniannews.net/wp-content/uploads/2024/05/Walone.jpg")
